حائطي
سجل دخولك او إضغط هنا للتسجيل
صباحكم روقان أعزائي ، شكلي طولت السالفه عليكم بحاول أنهيها اليوم هذا إذا قدرت أواصل ، مدري ليش هالسالفه ما يجيني خلق لها إلا آخر الليل << بدينا تخبيص أي آخر الليل الحين الفجر يلا بسولف عليكم لحد صلاة الفجر ... طيب يالربع خوينا (صاحبنا) مثل ما قلت لكم استخدم عدة طرق منها الصحيح ومنها الخطاطئ ذكرت لكم بعض الطرق الصحيحة التي أستخدمها والحين بقولكم وش سوى بعد من الطرق ولكن هالطريقه ما تصلح غير صحيحه ولكنه وصل لمرحله كره الدخان (السجائر) المهم أبو الشباب حول على الشيشه (الأرجيله) << أعرف لغات وش رايكم فيني حركات وأستمر على هالسالفه فتره يمكن سنه بس ماكانت الشيشه تجيب راسه زي الزقاره كما يتوهم وش هالراس ... نجي للزبده << أحس تقولون ياخي خلصنا وبعدين وش صار ، طبعاً أكثر من كرهني بالتدخين الوالده الله يطول بعمرها وزعلت يوم قلت لها تركت الزقاير لأني قلت لها أشرب شيشه مؤقتاً ، كل اللي سويته ما نفع ، المهم الحبيبه دعواتها هي السبب ، ففي يوم بحائل كانت الشيشه معي بالسياره مشتريها جديده قلت أخليها بالسياره كانت الأيام شتاء وطلعات ، ما أدري وش جاني بدون مقدمات قمت وفتحت شنطة السياره وأخذت الشيشه ورميتها بالزباله تكرمون ، ومن يومها هذاك يوم وهذا يوم الحمد لله والشكر له والمنه ، حسيت بتغير فرق بين يوم كنت أدخن والحين بكل شيء ، تخيلوا حتى حاسة الشم عند المدخن تكاد تكون معدومه ... طبعاً كل هذا بدايته كان بسبب أني فكرة وقلت ليش الواحد يتعب ويبحث عن وظيفه ويبي يأمن مستقبله وبعدين هو قاعد يذبح نفسه بالتدخين ، حسيت أني متناقض ، تعبت ودرست وتغربت عشان أرتاح بالمستقبل ، ما أدري بديت أتعب تعرفون السهر بس وصلتكم الفكره << أختصرت تعبت . آمل ذلك ، وللجميع تقبلوا كل ودادي وآمالي لكم بحياة دون تدخين .