ليسّ لأنه لم يعد في الأحياء خير يُرجى
ولكن لأنهُ لم يعُد في الأحياء الخير الذي فيك .
ياصادق ياصدوق
يارسول الصحبه الحلوة على الأرض .
ياحبيبي
وحبيب أمك وأبيك.
ياصديق الطفوله . تذكر أول مرة جيت فيها الحارة ؟
ماكنت عاجبك ولا كنت عاجبني نظراتك تشبرني من فوق لتحت و تقول على ايش راز نفسك وأنت راسك مايوصل حد كتفي !
ياصديق ( الكورة ) كم مرة قلت لك بطّل معاي أسلوب دقها والحقها وبطّل تكسير ؟
ياصديق ( المزح الثقيل ) كم مرة قلت لك لا تمزح معاي بيدك ورجلك ؟
الحين أقول تعال وحط رجلك تحت راسي
وكسر عظمي !
ياصديق ( الفركات من المدرسة ) والفطور في مطعم السليمانية . كم مرة أفطرنا وبعصير واحد لأن مصروفنا كان مايكفي ونقسمه بين فطور وراس معسل , عشان عشرة ريال كنا نفرك ونتحمل ضرب الوكيل لين يقطع يدينا ! ويوم نروح دورة مياة المدرسة نضحك !
ياصديق ( الغش في الامتحانات ) كم مرة قلت لا تجيني منت مذاكر وتقول غششني ؟
كم مرة قلت لك حسن خطك عشان أعرف أقراه !
ياصديق ( الطفره ) كم مرة قلت لك لا تنكبنا وتقول معاي فلوس لا تشيل هم وتخلي البنقالي يرفع صوته علينا قدام العالم , تعال الحين انا معاي فلوس قسم بالله . قسم بالله معاي فلوس تخلينا نقدر نروح نشرب معسل الين الفجر ومانخاف إن البنقالي يطردنا . كم مرة سرقنا سيارة أخوي وكدينا فيها عشان بكرة نروح البحر ؟
تصدق الحين عندي سيارة نقدر نكد عليها وقت مانبي ونروح البحر كل اسبوع مو مثل اول في الشهرين مرة .
الحين تصدق ؟ صرنا نقدر نسافر مع بعض مثل ماكنا نتمنى . يعني كل هذا يأس اننا مستحيل نسافر مع بعض , وسافرت لحالك ؟
ياصديق ( النذالة ) مافي أنذل منك في العالم بس نذالتك غير عن نذالة هالعالم !
ياصديق ( البالوت ) على فكرة ماصرت العب بالوت محد يعرف إذا هربت بنت الهاص وغمزت يعني وش أبي ؟
ياصديق ( الضحكة الحلوة والحلوة حد الدمع ) تصدق من كم سنة ماضحكت
وضحكت
وضحكت
لين دمعت عيوني و حطيت يدي على صدري !
الله يرحمك يافايز .