[حسين الشمري]

المشاركة الأصلية كتبت بواسطة مــنــــــآل

والله ياحسين الدنيا تصفق الواحد كفوف على وجهه

المشاركة الأصلية كتبت بواسطة مــنــــــآل

تخليه يمر بظروف تعصره وتخليه يكره الساعة اللي جاء بها للدنيا ..

حسين حديثك عن الحلاق سليم
ذكرني بسالفة كل ماذكرتها قلبي يوجعني وأتندم ..
قبل عشر سنوات كنت بالشهور الآخيرة من الحمل بولدي
وحالتي الصحية لك عليها شوي واضطريت أن أجيب لي شغالة تساعدني شوي
لكن سمعت بذآك اللي يقول ( جبتك ياعبدالمعين لتعين ..لقيتك ياعبدالمعين تنعان )
جبت لعمري شقى وبلشة .. من جبتها وهي تبكي ولاتفهم عربي ولاانجليزي ولازفت
وش فيك بابنت الحلال تقول بيبي .. وش فيه ذا البيبي ما ادري
المهم انا بعد اسبوع تقريبا من وصولها أنجبت ولدي
ولما انجبت وشافت المولود تجدد فيها الحزن وزادت بالبكاء وصارت ماتشتغل
وكله جالسة بغرفتها .. حاولت أفهم سبب هالجو اللي معيشه نفسها فيه ماقدرت
سببت لي قلق وانا فيني اللي مكفيني وشغل وأمور البيت تعطلت
قمت ناديت شغالة جارتي مثلها وقلت لها يابنت الحلال ترجمي لها كلامها
أنا تعبت منها مدري وش سالفتها .. ولما جلست وتكلمت معها
قالت لي انها جاية تشتغل وتاركة أول مولود لها عمره أسبوعين عند أمها
يعني حضرتها بفترة ( نفاس ) وتعبانة وتفكر بالمولود
وتفكر أنها ترجع له لأنها ماهي قادرة تتحمل أكثر ..
لما سمعت هالكلام بصراحة صبت دمعتي لما شفتها تبكي وتناظر لي
وعيونها حمراء من البكي وصوتها حززززين مررررة
كسرت خاطري .. وكنت مثلك ياحسين حاولت أني اخفف عنها
وقلت لها اني بخليها تكلمهم كل أسبوع والشغل أنا بساعدها فيه
لكنها ماش ماقدرت تتحمل الوضع اللي تمر فيه
رغم أني كنت عند كلمتي أحاول أخفف عنها بشغل البيت وأساعدها
وأدق لها على أهلها وأخليها تكلمهم لكن أهلها بعد مايستحون كل ما كلمتهم
قالوا لها ولدك تعبان و ولدك فيه و ولدك مدري وش بلاه يبكي
وتجلس تنوح عند راسي .. أحس أني أنا معها يصيبني حزن وقلق


وفي يوم من الآيام بعد مرور شهر تقريبا .. كنت صاحية نوم وكانت قافلة مع أختك وتعبانة بالحيل
جيتها ولقيتها بغرفتها تبكي وتاركة الشغل وماسوت ولانظفت ولاشي
ولما كلمتها قامت وقفت لي وصارت تصارخ بوجهي وهي تبكي وتقول لي بيبي
ولا أحس على نفسي إلا وأنا أعطيها ذآك الـكف على وجهها
والكف جاب كف وراه والثاني جاب الثالث
وربي بغيت أكفر فيها من الطق .. ماحسيت عن نفسي قهرتني وطلعتني من طوري
قلت شوفي روحة لهناك مانتي رايحة وشغل بتشتغلين
ولاني مساعدتك في شي ولاني متصلة لك على أهلك
وقومي هالحين قدامي وأشتغلي ... ومن بعدها صارت خوش حرمة
ونست ولدها و صارت تشتغل وكل شي تمام ...

بس أنا ندمت كثيييييييييييير على اللي سويته فيها
وكرهت نفسي وحاولت أني أرضيها بطريقة غير مباشرة
ولما جت تسافر اعتذرت منها ..

/
\

المغزى ياحسين أن الحزن وضيقة الصدر
كلنا معرضين لها فالإنسان معرض لظروف صعبة ومحن قاسية
بحينها تظن أنك لاتستطيع أن تتحملها وأنها فوق قدرتك على الإحتمال
لكن الإيمان والصبر واليقين بأن دوام الحال من المحال كفيل بإزالة كل حزن وهم
يعتري قلب الإنسان...



حسين وينك ليش غايب عن قسم الحوار كل هالفترة ..؟
تواجدك يسعدنـا .. يبهجنـــآ .. يفرحنــــآ فلا تبخل علينا ..!
تحيـــــــآتـي .

والله من الإجرام يا أم عبد الرحمن ، أدري هم يغثون
وماني مسوي نفسي مثالي بس الحمد لله إنك ندمتي
مع أنه مو مبرر لك لتكرارها ، صدقيني هم بعد مساكين
أدري أدري بتقولين هذا مروق وفاضي وأدري أنكم تتعبون
وما تجيكم الشغاله إلاّ بعد طلعت الروح وتطلع لك زي
هذي ، لكن الشكوى لله ما فيه مبرر أننا نقسى
عليهم أو نمد إيدينا عليهم والله إنتن يالحريم مجرمات ...

المهم يا طويلة العمر والسلامه كما تفضلتي هي محن
تمر ومصيرنا ننسى ، يالله ما علينا هي الحياة تجارب
تعلمنا ولا زلنا نتعلم ...

وبالنسبه للغياب ما أدري وش أقولك ما فيه سبب
معين ، عموماً على طاري يابخيل ذكرتيني بهذاك
اللي يقول يا بخيل ما تعزمني