صبـآح الخيـر .. يا شـمـس !!

[خالد العبدالله]

السلام عليكم

أخواني ..

قبل كم يوم بدأ النصف الثاني عندنا بالسعوديـّه .. وتذكرت لي قصه صارت معي يوم كنت في ثالث ابتدائي أعتقد .. يعني بالضبط عام 1992

اذكر في كتابـ القراءه .. قام أحمد
( هالإسم حفظناه من كثر مايتردد بكتاب القراءه هو وهند )
المهم قام أحمد يسأل نفسه .. وين تروح الشمس .. يمكن تنام المسكينه .. تتعب طول النهار وهي ( تكرف ) بالسماء ....

المهم قرر أحمد على شي .. راح ونام بدري .. وقام من بكرا بدري وقبل تطلع الشمس .. وقف عند باب بيتهم لين طلعت الشمس وسألها
أيتها الشمس أين تغيبين عنا !

قالت له / أنا أغيب عنكم واظهر على أناس غيركم

قال / طيب تاخذين وقت طويل وانتي غايبه .. أنا أكره الظلام لاعاد تطولين علينا

قالت له / حتى غيرك يبي مني وقت مثلك .. أنا أقسم وقتي بينكم بالتساوي

انتهت القصه بالكتـاب ....

لكن لم تنتهِ عندي .. ماكنت أعرف إن خيالي واسع لهالدرجـه .. ويمكن هالشي هو اللي خلاني بأمر الله أكون طويل

المهم .. أنا عاد مسكت معي أكلم الشمس ( قمة الخيـال الطفولي ) .. نمت بدري وقمت بدري والله قبل تطلع الشمس .. وتشوفوني ملطوع عند الباب انتظرها تطلـع ..
أول ماطلعت قلت لها ( أيتها الشمس .. أين تغيبين عنا !! )
وربي إني قلتها بالفصحى بعد قلت أخاف ماتفهم بالعاميه هههههههههههههههههههههههههههههههههههههه

والله هذا اللي حصل .. عاد انتم كملوا الباقي .. وأكيد النتيجه معروفـه .. أنا أسأل وهي جاحدتني وساكته

..




من يملك كـ / هذا الخيال !!
من لديه فكره كانت في عينه مجنونه .. ثم ضحك عليها !
لقلوبكم البياض .. فإفردوا بياضها هنا

خ.ألـد

 

[النيــــزك]

السلام عليكم

أخوي خالد

أضحك الله سنك وسنينك قل آمين

باين عليك نايم بدري وقاعد مروّق ومستاسع صدرك حيل

والا كان ما تذكرت مثل هالسالفه هههههه

تبي الصراحه .. كلنا دارت بروسنا مثل هالسوالف يوم كنا صغار بس عاد ما اتذكر اني جلست عند الباب أحتري الشمس لين تطلع عشان اسألها هههههه

يعطيك العافيه أخوي خالد

موضوع رااااايق وجميل ولذيذ مثل صاحبه

[الصوت المسموع]

الخيال الواسع عند الأطفال ماله حدود

أذكر وانا صغير أشوف في (أفلام الكرتون ) هذاك الي لابس مثل المشلح أظن اسمه ( سوبر مان )

أشوفه يقفز فالهوى ويمشي ويسوي حركات ..

المهم ..

أنا قررت أمشي في الهواء مثله ..:eek:

وكان عندنا جدار للحوش يمكن ارتفاعه متر أو متر ين وتحته تراب ناعم

صرت أطلع على الجدار وأقفز في الهوى وأمشي ..(طبعا انا امشي وانا نازل ) يعني تجي معي خطوة او خطوتين قبل أسقط على الأرض

أقوم وانا مبسوط وفرحان ويا الله انا مشيت مثل سوبر مان ( وأرجع مره ثانيه )

واحاول أزيد في عدد الخطوات ..

المهم , الشئ الجميل في الحكاية , أني ما سويتها من فوق سطح البيت , والا كان صارت علوم

[مشاعر انثى]

كلام جميل كمثل طهارة ونقاء قلبك اخوي خالد0
عجبني روح طفولتك البريئه
لله درك0
ولي عوده ان شاء الله

[الــمُــنـــى]

/
/

جمال الكون وبراءة الطفولة
كانت تٌرفرف هنا .. وتُدندن معك
هنا سمعت قهقهات الشباب على روح
الطفولة والُطهر التي كانت تسكنكم وتسكن
أرواح الصغار عادة ..

.
.

يمكن الشيء اللي لا زلت أضحك عليه بين الحين والآخر
هو " شجرة البيبسي " :p
كنت اتخيل مشروب البيبسي مثله مثل مشروب الشاي والقهوة
يعني له بذور تنزرع وبالنهايه تطلع شجرة " البيبسي " فتثمر
ومن ثمرها يصنع هذا المشروب ..
بس كان ينقصني بذورها ... :D
ومن زود الخيال العلمي اللي لا صار ولا أستوى
كنت أجمع القطع البلاستيكية اللي كانت توجد في الغطاء المعدني ( أيام زجاجات البيبسي )
يخلف الله علينا وعليكم ..
وكنت اقوم أنا ومجموعه من البنات في نهاية كل عام بدفن تلك القطع في التراب
ومن زود الفلاحه كنت اسقيهم بشراب البيبسي نفسه ..( ليش معرف :p..؟؟؟ )
وهالسالفة كنا نعيدها مع نهاية كل عام دراسي ..
الغريب في الأمر كان عندنا أمل أن الشجرة تطلع ببداية العام اليديد ، والعجب الأكبر
كنا ما نيأس مع أن النتيجه واضحة لا شجرة ولا هم يحزنون بس كنا نعيد الكرة على أمل
أن نرى شيئا من غرسنا أثمر وأينع ..
ومرت سنين وبنين والحال على ما هو عليه ..
لحد ما فهمنا إن السالفه ما هي إلا شطحات طفوليه وخبال يهال :o

.
.
أخي القدير / خالد العبدالله

هنا رأيت فراشات جزء منها ينثر
ألوان البهاء من حولك والبقية الأخرى
تتراقص فرحا وطربا لهكذا نقاء
دمت بخير

[سماح]

بارك الله في الجميع ,

أضحكتني هنا حفظك المولى , وكان لقرائتي العامية الأثر في ذلك
فلم اعتد القراءة العامية في القصص



تذكرت هنا موقف طافت بي الذكريات لهذا الزمان البريئ
كان لدينا في المنطقة مجمع وضع لافتة بها (قارورة ماء تسكب على كأس) واظنه للمشروبات لاادري
المهم كلما مررنا عند هذا كنت اتسائل (للحين ماخلصت القارورة معقول وأسال اخي ويقول مادري
وهكذا كلما مرينا انظر ونفس الحال , بعدين اقول هم يكذون علينا وإلا شنو,
ذلك الموقف كان يستقطع مني وقت للتفكير في ذلك ولكني لاابتعد عنه إلا ورجعت ثانية
والغريب المدهش المضحك إنني مررت بها بعد سنوات كنت وقتها اكثر وعيا منذي قبل
وتلقائيا وجدتني أكرر الجملة ذاتها , حتى هزئت من نفسي ومن سذاجة تفكيري









شكرا لكم

[حسين الشمري]

أيتها الشمس أين تغيبيين هههههههه أزين شيء إنك كلمتها بالفصحى

خيال الطفل واسع والقصص كثيره ،سأعود حالما تذكر أحداها .

[خالد العبدالله]

السلام عليكم

أخـوي النيـزك

عليك السلام .. ورحمة الله وبركاته

أضحك الله سنك وسنينك قل آمين

آمين




و




الحمد لله .. ترى صاحبك دااااااااايم مروق لله الحمد و الشكر


لكن كأنك تتشمت على سالفة إني كلمت الشمس !!

لاتضحك .. ترى ربي يبلاك لو بعيالك
بكرا يجيك واحد من عيالك يقول ( يبه الشمس وين تغيب عنا )
انتبه بس ههههههههههههههههههههه




::



الله يعافيك النيـزك

وبإنتظار رجوعك مع ( قصه قديمه لك ) ..










خ.ألـد

[خالد العبدالله]

السلام عليكم

أخوي الصـوت المسمـوع
أو
سوبر مـان .. قطرات

هههههههههههههههههههههههههههههههه


أنا قررت أمشي في الهواء مثله ..:eek:


( اعجبني الوجه اللي حاطه يا المسموع )
ههههههههههههههههههههههههههههههه




/




الصوت المسموع .. تبدو براءتك ملازمه لك منذ الصغر
ولو دققت شوي بحجم طفولتنا ..
لأيقنت أن التعليم و الإعلام عدما رسبوا بنتيجة ( سالب 1000 )


شكرا" لمرور عطر موضوعي ....








خ.ألـد

[خالد العبدالله]

السلام عليكم

أختي مشاعر أنثـى


أتمنى أن أكون فعلا" نفي القلب .. ليتي أستحق

و

بإنتظار عودتك .. ولو ببعض ماتحتفظين به من قصص لمساعد أو أخوانه
فقد أحببت هذا الطفل .. جدا"









خ.ألـد